Ningún político declarará este xoves no xuízo pola paga extra abonada aos funcionarios
Por Alejandro Espiño
A decisión do Concello de Pontevedra de compensar aos seus funcionarios a perda da paga extra de decembro de 2012, en contra do decreto aprobado no seu día polo Goberno, chega aos xulgados. A Delegación do Goberno en Galicia reclamará este xoves no Xulgado do Contencioso Administrativo número 1 de Pontevedra a devolución deste complemento, ao consideralo irregular e contrario á lei. Será nun xuízo que terá lugar ás 10.15 horas.
En concreto, na demanda presentada contra o Concello de Pontevedra, o único concello galego cuxa compensación aos seus funcionarios acabou denunciada nos xulgados, o Goberno esixe "que se condene ao Concello a recuperar as sumas indebidamente abonadas aos perceptores, adoptando calquera medida que fose necesaria para proceder ao seu reintegro á facenda municipal".
Segundo confirmou este martes o goberno municipal, nin o alcalde nin ningún dos concelleiros do executivo local terán que declarar ante a titular do Xulgado do Contencioso Administrativo número 1. Ao xuízo só asistirán Juan José Vázquez-Portomeñe, xefe da Abogacía do Estado en Pontevedra e o asesor xurídico do Concello, Xabier Munáiz, quen previsiblemente tamén ostentará a representación dos sindicatos da xunta de persoal que se persoaron na causa.
ANTECEDENTES
Este conflito pola paga extra abonada en Pontevedra iniciouse coa aprobación do Decreto Lei 20/2012, polo que o Goberno central decidiu eliminar a paga extra de decembro para reducir o gasto de persoal das Administracións públicas. Tras coñecer esa medida, o goberno municipal asegurou que buscaría fórmulas para que os seus traballadores mantivesen o seu nivel adquisitivo ao considerar inxusto este recorte.
O bipartito municipal decidiu entón compensar a perda de dita paga extra mediante a realización dun total de 16 horas extra, para que así os traballadores municipais puidesen cobrar un complemento de productividade coa súa nómina de novembro. En total, o Concello pagou 760.000 euros, con fondos propios, para abonar ese complemento a 474 funcionarios, persoal laboral e empregados do IMD e o Pazo da Cultura.
Relacionadas:
-
O Estado cualifica de "argucia fraudulenta" o pago da extra e o Concello non ve "eivas" na súa legalidade
Por Alejandro Espiño & Mónica Patxot |
-
Jacobo Moreira espera que o Estado perda o recurso contra o Concello de Pontevedra polo pagamento da 'extra'
Por Oskar Viéitez |
-
Fixan para o 23 de xaneiro do 2014 o xuízo contra o Concello pola paga extra
Por Oskar Viéitez |
-
O Goberno denuncia ao Concello para que os funcionarios devolvan a paga extra
Por Oskar Viéitez |
-
Lores: "Sabemos que a nosa rebeldía e insubmisión poder ter os seus riscos, pero asumímolo"
Por Alejandro Espiño |