Máis de 200 persoas participaron na xornada de piragüismo posta en marcha polo Concello da Lama no río Verdugo que tivo que botar man das embarcacións de reserva para atender a gran demanda suscitada por esta actividade que tivo que ser aprazada a pasada semana por mor da choiva 

As altas temperaturas e un sol radiante animaron aos participantes para surcar o río Verdugo en piragua, unha iniciativa lúdica para persoas de todas as idades incluída dentro do plan de actividades do “Verán Cultural” do Concello da Lama e que conta coa colaboración do Club de Piragüismo de Vilaboa.

Os participantes, provistos obrigatoriamente de chaleco salvavidas e supervisados por monitores do Club de Piragüismo de Vilaboa, participaron en 6 quendas corridas desde as 17 horas.

Os monitores explicaron aos participantes os distintos modelos de piragua e diferenzas existentes coas canoas. Tamén explicaron as principais técnicas para facer máis eficiente a palada na auga. Durante a xornada, estivo presente o terceiro tenente de alcalde, Andrés Cal Malleiro, quen tamén se inscribiu e se animou a embarcar co seu fillo e facer a tarvesía polo Verdugo.

O éxito deste evento confirman que esta actividade pioneira na comarca do Verdugo-Oitavén é unha cita obrigada do verán para os veciños e veciñas da Lama e os seus visitantes xa que lles permite un maior goce do tempo libre familiar e favorece tamén a interrelación xeracional a través da práctica de actividades saudables e de encontro coa natureza.