Este sábado 18 disputarase o partido de fútbol entre o Viaxes Interrías FF e o Real Madrid B, ás 17.00 horas, no campo de O Revel, un encontro que se disputará baixo o lema 'Este partido é de todos e todas' co obxectivo de incentivar a igualdade no deporte.

Este xoves, as concelleiras Paz Lago e Nati Parada, encargadas de Servizos Sociais e Educación no Concello de Sanxenxo, colgaban a lona da campaña 'Sanxenxo. Concello libre de Violencias Machistas' no balcón da alcaldía e presentaban este partido, acompañadas por Enrique Rodríguez, presidente do club Viaxes Interrías FF.

Anunciaban que durante o choque futbolístico vai despregarse unha pancarta reivindicativa e realizaranse intercambios de brazaletes morados. Ademais, dentro do acto central do 25-N, o club fará público un vídeo elaborado polas xogadoras co lema 'Non é non'.

Esta actividade forma parte da programación prevista de cara ao Día Internacional contra a Violencia de Xénero, data na que o Pazo de Emilia Pardo Bazán será escenario dun acto en que se proxectará un vídeo fotográfico e musical contra a violencia machista, a partir das 19.00 horas. Neste traballo participan as asociacións de mulleres de Sanxenxo, a Banda de Música do municipio e o taller de memoria.

A psicóloga Marta Martínez, veciña de Dorrón e autora do libro 'Que sea amor del bueno', será a encargada de dar lectura ao manifesto con motivo do 25N.

Neste acto tamén se presentará o punto violeta do Concello de Sanxenxo e entre as persoas asistentes repartirase material de sensibilización e de prevención.