Con dúas semanas de atraso, debido ás choivas das últimas semanas, Marín puido completar as súas Andainas de Outono, un ciclo de sendeirismo que propoñía camiñar por algunhas das rutas habilitadas no municipio e divulgalas entre a cidadanía.

Tras un primeiro paseo polo roteiro dos montes e as praias, decenas de persoas participaron este domingo na camiñada organizada pola ruta dos cinco miradoiros.

Os participantes partiron ás nove e media da mañá da Alameda de Marín, desde a que percorreron os nove quilómetros deste roteiro circular.

Algúns dos puntos de interese que percorreron os camiñantes antes de regresar ao momento de partida, foron, entre outros, as praias de Portocelo e Mogor, os petróglifos de Mogor, o miradoiro de Cruceiro do Vento, a capela de Sete Espadas ou o castro da Subidá.