O alcalde de Poio, Ángel Moldes, xunto con membros da corporación e do Consello Municipal da Muller, participou este venres no parón institucional e na lectura do manifesto para conmemorar o Día internacional da eliminación da violencia contra as mulleres.

O manifesto identifica á violencia contra as mulleres como "a forma máis extrema de discriminación, con graves consecuencias físicas, sociais, económicas e psicolóxicas sobre as mulleres, a curto e longo prazo, que lles impiden participar plenamente e en condicións de igualdade na sociedade".

O Concello de Poio asume que todas as institucións e poderes públicos "temos o deber de adoptar as medidas necesarias para combatela".

Neste manifesto, Poio lembra a todas as vitimas desta lacra, en especial a Beatriz Lijó, de 47 anos, e Ana Vanesa Serén, de 44 anos, ambas asasinadas este ano en Galicia polas súas exparellas. "Os seus asasinatos son a expresión maior desta barbarie machista, que deixa un regueiro de vítimas".

"Desgrazadamente, fronte a esta realidade tráxica e incontestable, esténdense discursos que banalizan ou negan a violencia machista", é por iso que o Concello entende "absolutamente necesaria" a reacción "unánime" de todos: identificando esta violencia, recoñecendo as súas sinais, "facendo recaer o peso da lei e da sociedade unida sobre quen a exerce e rexeitando de forma contundente a quen a xustifica e a quen ostenta actitudes que a promoven".

Por último, también salienta esta declaración que "cómpre rexeitar tamén a indiferenza, a pasividade ou a tolerancia, actitudes cómplices desta violencia que favorecen o mantemento de situacións de desigualdade e discriminación intolerables nunha sociedade avanzada e democrática como a nosa".