A gran estrea infantil do Culturgal 2016 veu da man do proxecto musical, María Fumaça, cun espectáculo especial este domingo que tivo un grande éxito de público.
O que se presentou na mañá desde domingo foi a terceira entrada deste proxecto da Editorial Galaxia e levou ao auditorio do Pazo da Cultura o tren que xa é símbolo desta iniciativa cunha chea de músicos e personaxes a bordo, capitaneados por Uxía e ao redor de Rui, inspirador e motor do proxecto.
Na Feira das Industrias Culturais de Galicia os nenos son sempre grandes protagonistas e este 2016 non ía ser menos.
O Culturgal deste ano leva por título 'Cultura, comunidade, futuro' e achegou ata o recinto feiral durante os tres últimos días música, teatro, danza, libros e ciencia para os máis pequenos, con propostas especiais do Consello Superior de Investigacións Científicas (CSIC) en colaboración coa Misión Biolóxica de Galicia e espazos para os xogos e xoguetes tradicionais.
Na vertente musical, ademais de María Fumaça, foron protagonistas Pablo Díaz, Títeres Alakrán e Vaioviravai, entre moitos outros.