A organización do Salón do Libro levará a cabo durante os próximos días diferentes iniciativas para festexar o Día do Libro. A primeira será este xoves, 21 de abril. A partir das 12.30 horas da mañá, os escolares e adultos que queiran participar poderán atopar en lugares emblemáticos da cidade cincuenta exemplares de 'As peripecias de Extravaganzza Pérez', o libro escrito por Ledicia Costas nunha edición limitada de 2.000 exemplares para o Salón do Libro.
Ante a previsión de choivas, estes libros atoparanse situados nesas zonas da cidade envolvidos nunha bolsa plástica transparente con peche hermético e contarán cunha etiqueta que pon "Lévame". No interior inclúese un pequeno cartón que felicita o Día do Libro e convida os receptores para quedar co exemplar ou a compartilo unha vez finalizado para continuar a cadea.
Tamén durante este xoves, a partir das 10.00 horas coñecerase o nome dos gañadores dos 30 libros sorteados a través do Facebook do Salón do Libro.
O 23 de abril, os asistentes á estrea de 'O esquío rampante' de Polo correo do vento tamén obterán un exemplar desta obra de Ledicia Costas coa compra das entradas para o espectáculo. As entradas teñen un prezo de 3 euros. Está previsto que se repartan 700 exemplares.