A programación previa á celebración da gala dos Premios Feroz continúa a súa andaina este novembro en Pontevedra. Nesta ocasión, o debate sobre da perspectiva de xénero no cinema centrará a maior parte das propostas culturais. Este mércores, 6 de novembro o programa Feroz é dobre, pola mañá haberá unha mesa de debate, e pola tarde proxección de cinema.
A partir das 12.00 horas a Facultade de Comunicación acollerá unha mesa de debate organizada en colaboración coa Asociación Galega de Produtoras Independentes (AGAPI) na que estarán presentes Sonia Méndez (directora de As Neves e socia de Cósmica), Chelo Loureiro (de Abano Producións) e Sara Horta (produtora en Indígena Films).
Elas abordarán a visión das directoras e produtoras no escenario baixo o título "Mulleres que contan". A moderadora será Uxía Caride, xerente de AGAPI. A entrada é de balde.
Pola tarde, Feroz retoma as proxeccións de cinema achegando ao público clásicos modernos do cine español dentro dun ciclo especial con perspectiva feminista.
A proxección prevista para o mércores será 'Lucía y el sexo' (Julio Medem, 2001) que comezará ás 18.30 horas na facultade de Comunicación. Ao seu remate, Paula Serna do Observatorio da Diversidade en Medios Audiovisuais (ODA) abordará a presenza feminina na película.
Ao igual que no mes de outubro, a entrada ás proxeccións é de balde pero hai que retiralas na Oficina de Turismo da cidade, situada na praza de España. Pódense coller sete días antes de cada proxección até máximo de 4 localidades por persoa. Aqueles convites que non se entreguen repartiranse cinco minutos antes do inicio da proxección na facultade de Comunicación.
Engade Pontevedra Viva como fonte preferida de Google de balde
Mantente informado coas últimas noticias de actualidade.