A memoria de Leo Diz segue moi viva. Xusto este sábado 25 de outubro tería cumprido 4 anos, e por iso é a data escollida para homenaxear o seu legado anunciando a recadación conseguida na terceira edición da Carreira de Leo.
A proba solidaria, organizada en Meis pola familia do pequeno, celebrouse o pasado 5 de outubro superando os 2.000 inscritos entre a súa carreira absoluta de 5 quilómetros e unha andaina popular.
O importante era participar e colaborar cunha boa causa.
En concreto a Carreira de Leo 2025, grazas á implicación de participantes e colaboradores, logrou recadar 39.954,44 euros.
Estes fondos serán destinados á Asociación Española de Enfermos de Alexandre e á entidade Duchenne Parent Project, para poder colaborar na axuda e investigación de enfermidades raras como a que padeceu Leo.
Ademais, as asociacións beneficiarias obtiveron 2.866 euros da venda de produtos nos postos que habilitaron durante a xornada.
"Nun contexto social marcado pola crispación e o desacougo, o vivido en Meis o pasado 5 de outubro é un raio de luz", asegura Toño Diz, promotor da carreira solidaria e pai de Leo.
Xunto á confirmación da cantidade recadada, os seus responsables quixeron tamén compartir un vídeo de agradecemento a todos os que o fixeron posible.