Un cento de rapaces de toda Galicia, todos eles deportistas de doce disciplinas diferentes, comezaron un novo curso no Centro Galego de Tecnificación Deportiva.
Baixo a atenta mirada da secretaria xeral para o Deporte, Marta Míguez, o curso arrancou coa novidade do incremento de bolseiros e prazas de residencia e co anuncio de novos investimentos en material e infraestruturas.
A Xunta investirá este ano 1.755.437 euros nos bolseiros do CGTD, deportistas que adestran para converterse en referentes en atletismo, bádminton, judo, karate, loita, natación, piragüismo, remo, taekwondo, tríatlon, vela e ximnasia.
Marta Míguez animou aos deportistas presentes no inicio do curso, avanzando que desde o goberno galego "poremos os medios necesarios á vosa disposición para que consigades grandes éxitos dos que Galicia será partícipe e beneficiaria".
Desde a Secretaría Xeral para o Deporte, engadiu, ven o CGDT de Pontevedra como "unha das nosas mellores ferramentas" para avanzar na calidade do deporte galego.
No último ano, ademais dos cartos correspondentes ás bolsas dos deportistas, a Xunta investiu máis de 444.000 euros en equipamento, renovación das infraestruturas e diferentes melloras en accesibilidade e no material que está a disposición dos mozos e mozas que adestran alí.