Tras case mes e medio de traballos na pista de atletismo, o Centro Galego de Tecnificación Deportiva (CGTD) de Pontevedra recupera a normalidade.
Os clubs e atletas poden xa usar de novo as instalacións para a súa preparación, tras semanas tirando de imaxinación para poder seguir adestrando, unha vez concluídas as obras de renovación da zona de competición de atletismo.
Esta renovación, necesaria, conclúese a tempo para a celebración o vindeiro sábado 22 de xuño do Campionato de España Sub-18 de Federacións Autonómicas.
Ademais e sen perder tempo a Sociedad Gimnástica reprogamou o seu Circuíto de Atletismo en Pista, do que tivera que cancelar varios eventos.
Así, antes do nacional, a primeira competición na renovada pista do CGTD será este mesmo xoves 20 de xuño o XXV Memorial Celso Mariño, ao que lle seguirán o día 26 de xuño o L Trofeo Boa Vila, o 3 de xullo o XLVIII Trofeo SG Pontevedra e o 10 de xullo o XLVII Trofeo Virxe Peregrina. Pechará o Circuíto de Atletismo da Sociedad Gimnástica o XXIX Trofeo Cidade de Pontevedra nunha data aínda por determinar.