Os profesionais da procura pontevedresa, acompañados de destacados membros da comunidade xudicial, celebraron este venres un acto de homenaxe a Pedro Sanjuán, ex vicedecano do Colexio de Procuradores cunha dilatada traxectoria profesional e servizo na xunta de goberno colexial durante máis de 20 anos, e que faleceu en decembro de 2020.
Tras asistir xunto á familia a un acto relixioso na igrexa de San Xosé de Campolongo, o decano Gabriel Santos, acompañado do presidente da Audiencia Provincial, Francisco Javier Menéndez Estébanez, o secretario coordinador provincial dos xulgados de Pontevedra, José Tronchoni Albert, e de numerosos membros da comunidade xudicial e procuradores de toda a provincia, celebraron un acto de homenaxe na sala nobre da Audiencia Provincial.
Durante o acto entregaron á familia a distinción que recoñece a Sanjuán como primeiro colexiado de honra dos procuradores pontevedreses.
O acto foi dirixido pola actual vicedecana, Elena Montáns, e contou coas intervencións do secretario do colexio, Faustino Maquieira, o decano Gabriel Santos, o presidente da Audiencia, Francisco Javier Menéndez e o ex decano, Jesús Martínez Melón, que compartiu con Sanjuán moitos anos de servizo na Xunta de Goberno colexial.
Na súa intervención, o decano Gabriel Santos, rendeu tributo a "unha figura esencial da procura pontevedresa", e subliñou unha intachable traxectoria de tres décadas durante as que Sanjuán destacou non só pola súa gran pericia profesional, senón polo seu "constante compromiso coa profesión" e por "unha vocación permanente de servizo público" que o levou a formar parte das sucesivas xuntas de goberno dos últimos 20 anos.
O decano incidiu na profunda transformación experimentada pola profesión durante esas dúas décadas, que levou á readaptación dos despachos profesionais, con cambios na propia estrutura colexial e no acceso á práctica da procuradoría, a perda da territorialidade ou a implantación das novas tecnoloxías.
Durante ese período, Pedro Sanjuán cumpriu, sobre todo no partido xudicial de Pontevedra, "un labor divulgativo, formativo e pedagóxico encomiable".
Santos destacou do homenaxeado "o seu carácter aberto e próximo, a súa solidariedade cos compañeiros de profesión, o seu talante dialogado e reflexivo, a súa predisposición para abordar os problemas con diálogo e equilibrio", uns atributos que representan "a imaxe da excelencia profesional".
Ademais, concluíu a súa intervención animando a todos os profesionais da procura a ter presente o seu legado, un legado "que forma xa parte da intrahistoria do Ilustre Colexio de Procuradores de Pontevedra".
Engade Pontevedra Viva como fonte preferida de Google de balde
Mantente informado coas últimas noticias de actualidade.