A espectacular procesión marítima do Carme volve emocionar a Marín

Como marca a tradición, cada 16 de xullo, a xente do mar celebrou á súa patroa.

As procesións en honra á Virxe do Carme sucedéronse nas principais localidades mariñeiras das Rías Baixas.

Aínda que, sen dúbida, en Marín esta xornada vívese dunha forma especial.

Centos de persoas renovaron a súa devoción pola protectora da súa flota con diversas ofrendas florais e a tradicional procesión marítima pola ría de Pontevedra.

Os actos centrais comezaron sobre as seis e media da tarde coa ofrenda floral á virxe que partiu desde a casa consistorial.

A comitiva, formada por autoridades e numerosos fieis, acompañou á santa polas principais rúas do centro urbano até a igrexa parroquial de Santa María do Porto.

Tras a ofrenda, os costaleiros continuaron até o porto, onde subiron á Virxe do Carme á embarcación Novo San Cibrán para asucar as augas da ría.

Fíxoo, como é habitual, acompañada no seu periplo por numerosos barcos pesqueiros e de recreo, facendo que esta procesión fora multitudinaria.

Mentres, numeroso público contemplaba a estampa con gran atención desde o Paseo Alcalde Blanco.

Esta procesión marítima, unha das tradicións máis arraigadas en Marín, estivo amenizada pola música de Os Chaneiros e da Banda de Música de Marín.

Ao regresar a porto e antes de regresar á igrexa entre flores, produciuse a sentida interpretación da Salve Mariñeira e o recordo aos profesionais do mar falecidos.