Se todo vai segundo o previsto, a esperada rehabilitación integral do convento de Santa Clara sairá a contratación antes de que termine este ano.
Así o indicou o vicepresidente da Deputación de Pontevedra, Rafa Domínguez, que avanzou que nas próximas semanas haberá "noticias importantes".
"O proxecto está súper avanzado", explicou Domínguez, aínda que non quixo fixar prazos máis concretos porque "tento ser o máis realista posible".
O que si confirmou é que o custo desta intervención segue aumentando.
Estima que, finalmente, superará os 28 millóns de euros.
"É o maior proxecto de recuperación patrimonial das próximas décadas", defendeu o vicepresidente provincial.
Sostivo que pensar en Santa Clara é "pensar na Pontevedra do próximos cincuenta ou cen anos", xa que contribuirá a situar á cidade como referente cultural.
Nestes momentos, no recinto do antigo convento coinciden as escavacións arqueolóxicas previas á solicitude de licenza para a súa rehabilitación, cos labores de poda nos seus xardíns.
Co convento e a reforma dos seus edificios fundacionais, o Museo de Pontevedra está, ás portas do seu centenario, "vivindo un dos seus mellores momentos", segundo Domínguez.
Para el, gobernar "consiste tamén en deixar un legado, en protexer o patrimonio, en abrir novos espazos públicos e en crear oportunidades para as xeracións que veñen".
Engade Pontevedra Viva como fonte preferida de Google de balde
Mantente informado coas últimas noticias de actualidade.