A Chuvia aínda lle custa falar da agresión homófoba que sufriu o pasado sábado en Pontevedra. Foi na contorna da Praza de Galicia, en pleno centro da cidade.
Tras quedar cun amigo para tomar algo, ía xa camiño á súa casa. "Estaba un pouco cansa e decidín dar un paseíño para refrescarme", lembra.
Cando, xa de madrugada, pasaba polas inmediacións da parada do autobús cruzouse con tres descoñecidos que comezaron a increpala.
"Empecei a escoitar iso de que esta fixo que é da outra acera", relata Chuvia, que optou por ignorar eses comentarios "porque se non ía ser peor".
Pero a pesar dos seus intentos, os seus agresores non a deixaron en paz. "Empezáronme a gritar bollera de merda e a dicirme que a miña avoa estaría contenta", explica.
Acelerou o paso para marchar canto antes de alí. As voces que ouvía ás súas costas parecían estar silenciadas, pero de súpeto chegaron os golpes.
"Déronme cunha botella na cabeza", asegura a moza, exhibindo as marcas que aínda son visibles no pescozo e no seu ollo dereito.
O ataque foi tan sorpresivo que non viu nada. O único que fixo foi tratar de protexerse dos golpes. "Cando pararon abrín os ollos e xa non había ninguén", afirma.
A agresión deixouna "bastante desorientada", afirma Chuvia, que recoñece que "o único que quería era chegar á miña casa". Alí atendérona as súas compañeiras de piso.
"Estiveron a axudarme coas curas e axudáronme tamén a chamar á policía", rememora a moza, unha chamada que, segundo lamenta, non lle serviu de nada. Ao non ver aos seus agresores, "dixéronme que pouco podían facer".
Iso foi o que a impulsou a denunciar o seu caso por redes sociais. "Subino para que a xente estivese atenta. A ninguén ten que pasarlle nada, xa sexa homosexual ou heterosexual", sentenza aínda doída.
"Non entendo por que alguén querería pegarme porque si. Son unha persoa bastante tranquila como para meterme nestas cousas", reflexiona Chuvia.
Aínda agora, días despois do sucedido, cústalle saír de casa. "Teño un pouco de medo, mesmo cando vou andando durante o día", recoñece a moza.
Esta é a segunda agresión homófoba rexistrada en Pontevedra nos últimos meses.
En marzo, tres persoas foron detidas por insultar e golpear un mozo ás portas dun local de copas de Pontevedra. Perseguírono e tirárono ao chan, provocándolle diversas lesións, entre elas unha fractura de nariz.
Tras este novo episodio de LGBTIfobia, desde a asociación Avante LGBT+ Pontevedra lamentaron que as vítimas sufran violencia verbal e física "polo simple feito de existir e de mostrarse como son".
A moza agredida "camiñaba tranquila pola rúa", algo que segundo este colectivo aos seus agresores "xa lles pareceu suficiente" para pegarlle, un delito de odio que, ao seu xuízo "debe ter as súas consecuencias".
"Non permitiremos que os discursos de odio gobernen os espazos públicos infundindo medo ás persoas LGBTIQ+ nin a outros colectivos que están nas marxes", sosteñen os responsables de Avante LGBT+ Pontevedra.
Estas agresións, sentencian os seus portavoces, "non van facer que desaparezamos, que calemos ou que deixemos de loitar polos nosos dereitos".
Engade Pontevedra Viva como fonte preferida de Google de balde
Mantente informado coas últimas noticias de actualidade.