O vicepresidente da Deputación de Pontevedra, Rafa Domínguez, anunciou este mércores que a vindeira semana se presentará ante a Xunta de Goberno o convenio de colaboración entre o Concello de Pontevedra e a Deputación Provincial para executar as obras de acondicionamento da parcela situada sobre a vía férrea da Rúa Doce de Novembro, que conecta Joaquín Costa cos Xulgados da Parda.
Durante unhas declaracións in situ, Domínguez detallou que a Deputación financiará o 100% do proxecto, cunha inversión de 710.972,2 euros.
"É un convenio de colaboración entre o Concello de Pontevedra e a Deputación de Pontevedra para a execución destas obras, que responde a unha das demandas históricas do Concello", afirmou o vicepresidente.
O prazo de execución esténdese ata o 31 de decembro de 2026, coa posibilidade dunha prórroga ata finais de 2027 en caso de xustificación obxectiva.
Domínguez subliñou que mentres a Deputación encárgase do financiamento, o proxecto básico é responsabilidade do Concello de Pontevedra.
O novo espazo, que abranguerá unha superficie de 4.648 metros cadrados, converterase nun parque urbano accesible para todos os cidadáns.
Entre as características destacadas do proxecto, Domínguez mencionaba a eliminación de barreiras arquitectónicas actuais, a integración dunha parede de vexetación na parte posterior, a instalación dunha fonte ornamental e un sistema de iluminación potente pero esteticamente sinxelo.
"Vai haber un muro posterior de vexetación que vai humanizar máis se cabe un espazo que os pontevedreses viamos desaproveitado", engadiu Domínguez, resaltando a importancia desta colaboración institucional.
En marzo deste ano, o alcalde de Pontevedra, Miguel Anxo Fernández Lores, anunciara a saída a licitación desta obra.
O proxecto, que levaba case tres anos en planificación, contempla a ampliación da pasarela de José Adrio cara a Doce de Novembro, incorporando este espazo que agora se atopa rodeado de valos, sen acceso público, e que só foi utilizado nos últimos meses por operarios das empresas de construción da nova residencia da Fundación Amancio Ortega para almacenar material.
Domínguez aclarou que, polo de agora, non está previsto o acceso peonil á zona ata a conclusión dos traballos.
O plan orixinal, segundo o anunciado polo alcalde, divide a intervención en tres zonas: unha área verde próxima á calzada, unha zona de estar sobre a cuberta do túnel con pavimento de formigón branco e negro, e unha área verde principal xunto ás fachadas traseiras dos edificios de Santa Teresa de Jesús Jornet.