Veciños de Lourizán levaron a cabo este domingo un novo acto de protesta, nesta ocasión a través dunha performance, un acto simbólico e teatralizado que tiña lugar no que denominan "campo da Dignidade".
Baixo o título "As alegacións son papel mollado para a Xunta", un grupo de veciños entregaban as súas alegacións contra o novo emisario mentres que dous representantes veciñais con caretas da conselleira de Infraestruturas e do presidente autonómico recollían os escritos. Desta forma Ethel Vázquez daba o rexistro de entrada mentres que o personaxe que caracterizaba a Alberto Núñez Feijóo mergullaba os papeis nun recipiente de auga e, a continuación, tirábaos nun inodoro.
Con esta intervención, a Plataforma Veciñal de Lourizán quere denunciar que estes procesos de presentación de alegacións, en concreto, as referidas ao novo emisario submarino convertéronse nun mero trámite para a Xunta de Galicia. Entenden que non se analiza o fundamento destes escritos, que pasan a converterse en "papel mollado".
Sinalan que a Xunta xa ten anunciado, antes de rematar a fase de alegacións do novo emisario mergullado, a licitación para marzo e xa figura nos seus orzamentos de 2019.
Lembran que a empresa que redactou o proxecto do emisario actual en 1989 sinalaban que a zona de instalación era a idónea e ante as alegacións xa se dicía que non ía afectar á calidade das augas de baño nin aos bancos marisqueiros nin tampouco á Illa de Tambo.
Segundo este colectivo veciñal o paso do tempo demostrou que a zona do fondo da ría quedou afectada por aquel emisario ata o punto de que é o que "xustifica a necesidade de instalar un novo tubo emisario para as augas residuais urbanas", alegan desde a Plataforma.