A Policía Nacional investiga unha agresión homófoba no centro histórico de Pontevedra

A Policía Nacional investiga unha presunta agresión de carácter homófobo denunciada pola vítima na Comisaría Provincial de Pontevedra, segundo confirmaron fontes oficiais do propio corpo policial.

De acordo co relato recollido na denuncia, os feitos producíronse ás 8:45 horas do pasado domingo ás portas dun establecemento de hostalaría situado na rúa Dona Teresa, en pleno centro histórico.

Ademais do testemuño presentado ante a policía, unha testemuña difundiu en redes sociais un vídeo no que ofrece a súa versión do ocorrido. Na gravación explica que ela e o seu amigo atopábanse no lugar "tranquilamente, sin hablar con nadie ni molestando a nadie", cando un grupo de mozos, de ao redor de 20 anos, comezou a increparlles.

Segundo o seu relato, os presuntos agresores manifestáronlles que lles molestaba a súa presenza na zona e esixíronlles que abandonasen o lugar. "Decían que les molestaba que estuviéramos allí y nos exigían que nos fuéramos", afirma.

"En ese momento comenzaron los insultos y su actitud se volvió cada vez más agresiva y claramente homófoba", afirma a testemuña no vídeo difundido.

Esta mesma persoa sostén que, ante o aumento da tensión, decidiu non responder as provocacións e aconsellou ao seu amigo que se marchase do lugar "porque temía que aquello acabara mal" e empezou a gravar co móbil.

Sempre segundo a súa versión, o grupo de mozos comezou entón a ameazar con ir a por el. "Él ya se estaba marchando cuando varios de ellos salieron corriendo detrás de él. Yo les gritaba que, por favor, pararan, pero le alcanzaron, le golpearon brutalmente, le tiraron al suelo y le rompieron la nariz", relata.

Tras a agresión, a vítima logrou incorporarse e, xunto ao seu acompañante, fuxiu do lugar correndo.

A testemuña conclúe o seu relato lamentando que "en 2026 todavía hay personas que creen que pueden atacar a alguien por su orientación sexual".

A Policía Nacional traballa agora a partir da denuncia presentada e doutros datos achegados por persoas que se atopaban na zona no momento dos feitos.

Entre as probas solicitadas figura polo menos unha gravación en vídeo que podería contribuír a identificar aos presuntos autores e, no seu caso, proceder á súa detención.