O Concello de Pontevedra escolleu un perfil vinculado á cultura e o xornalismo para dar inicio ás Festas da Peregrina no tradicional pregón do próximo sábado 8 de agosto.
Ramón Rozas será quen exerza de pregoeiro nesta ocasión e como tal o presentou este venres o alcalde Miguel Anxo Fernández Lores sinalando que "é un orgullo telo de pregoeiro para un final de mandato".
Tras agradecer a elección para o mencionado encargo, Rozas engadía que "para alguén que leva tanto tempo vivindo e traballando en Pontevedra é alegría, orgullo e responsabilidade".
Deixando constancia do seu apego por Pontevedra sinalou que "é unha ciuda moi especial onde se xuntan moitas cousas, aspectos históricos, xeográficos e humanos".
Ramón Rozas Domínguez, naceu en Santiago de Compostela e desde os sete anos reside en Pontevedra.
É licenciado en Historia da Arte pola USC, compaxina a súa actividade profesional en Diario de Pontevedra co comisariado artístico e a participación en catálogos e publicacións culturais.
É tamén membro do Consello da Cultura Galega na sección de creación e artes visuais contemporáneas.
Con este currículo "entendo que ao chamarme a cultura ten que ser a protagonista do pregón", avanzaba.
E así será, segundo adiantaba, xa que a redacción está lista, feita "con coidado, agarimo e coidando tamén a súa calidade literaria" pensando en quen non poidan estar presentes na Praza de España o 8 de agosto e achéguense ao pregón a través da súa lectura.
Por agora, da súa intervención desvelou que: "a historia das cidades fórmase co real e o imaxinario e a miña proposta é facer unha viaxe ao longo do tempo; con espazos e personaxes para dar respostas ao que sentimos cando percorremos Pontevedra". Unha viaxe para o que buscou "dous actores principais".
Engade Pontevedra Viva como fonte preferida de Google de balde
Mantente informado coas últimas noticias de actualidade.