Axentes da Garda Civil e da Policía Nacional veñen de desarticular un grupo criminal integrado por seis persoas presuntamente especializado en roubos con forza en entidades bancarias de distintos puntos do territorio nacional.
A operación permitiu esclarecer vinte e cinco feitos delituosos e saldouse coa detención de todos os integrantes da organización, que ingresaron en prisión provisional por orde xudicial.
A investigación iniciouse en marzo de 2025 tras un roubo con violencia e intimidación cometido nun hotel de Sanxenxo, no que os autores utilizaron armas de fogo.
Meses despois, a finais dese mesmo ano, os investigadores detectaron un incremento de roubos en sucursais bancarias da provincia de Madrid e de territorios limítrofes, o que permitiu establecer unha posible conexión entre varios asaltos.
As primeiras pescudas apuntaron a un grupo asentado no sur da Comunidade de Madrid, con experiencia previa neste tipo de delitos e unha estrutura organizada para preparar os seus golpes.
Segundo a investigación, os integrantes subtraían vehículos de alta gama en distintas localidades, modificaban as súas matrículas mediante placas roubadas ou falsificadas e utilizábanos para desprazarse até pequenas localidades durante a madrugada.
Os asaltantes accedían ás entidades bancarias tras inutilizar os seus sistemas de seguridade, mediante métodos como o corte de cableado ou o uso de inhibidores de frecuencia.
Unha vez no interior, empregaban ferramentas especializadas para abrir ou extraer as caixas fortes en cuestión de minutos e trasladalas aos vehículos previamente preparados. Nunha soa noite chegaron a apoderarse de 132.000 euros.
A organización está relacionada presuntamente con roubos en sucursais bancarias de Perales de Tajuña, Torrelaguna, Cobeña e Bustarviejo, en Madrid; Oropesa e Quismondo, en Toledo; e El Casar, en Guadalaxara.
Ademais, atribúeselles un roubo nunha xoiaría de Alacante, o asalto ao hotel de Sanxenxo e a subtracción de seis vehículos, así como numerosos furtos de placas de matrícula en Madrid e Granada.
A fase final da operación incluíu nove rexistros domiciliarios nas provincias de Madrid, Barcelona e Toledo.
Neles, os axentes interviñeron dúas armas de fogo curtas, catro armas simuladas, dúas armas longas, unha caixa forte procedente dunha entidade bancaria, unha ferramenta hidráulica para aperturas forzadas, inhibidores, un detector de balizas, grilletes, chalecos antibalas e varias pezas con distintivos de Garda Civil e Policía Nacional.
Tamén foron localizados unha troqueladora de matrículas, placas falsas, material empregado para a subtracción de vehículos, oito vehículos de alta gama dos que catro deles presuntamente eran roubados, 26.000 euros en efectivo, nove reloxos de alta gama e diversas xoias.
Aos detidos impútanselles delitos de pertenza a grupo criminal, roubo con violencia e intimidación, roubo con forza, tenencia ilícita de armas, falsidade documental, branqueo de capitais, roubo ou furto de uso de vehículo, usurpación de funcións e contra a seguridade viaria.
A investigación foi desenvolvida por unidades das Comandancias da Garda Civil de Madrid e Pontevedra, xunto coa Brigada Provincial de Policía Xudicial da Policía Nacional de Madrid.