Sanxenxo optou este ano por presumir de paisaxe de sendas e espazos verdes na Feira Internacional de Turismo (Fitur) que comezou este mércores en Madrid.
Alí presentou unha nova guía de sendeiros azuis en formato papel e descargable por código QR que, durante os próximos días, estará dispoñible no mostrador que ten Sanxenxo na caseta de Turismo de Galicia.
Fitur, segundo asegurou o alcalde, Telmo Martín, é un "escaparate excepcional" para mostrar a variada oferta turística de Sanxenxo, que contou co apoio do presidente da Xunta de Galicia, Alfonso Rueda.
Nesta ocasión, o mural traseiro elixido para ilustrar a presenza de Sanxenxo nesta feira é unha foto que fai unha chiscadela á costa, ao patrimonio coa ermida da Lanzada ao fondo cunha sendeirista en primeiro plano de costas.
A nova guía dedicada aos oito sendeiros azuis e a todos os recursos naturais de Sanxenxo busca incrementar cada vez máis as pernoitas fóra das tempadas altas xa consolidadas no municipio, dentro da súa marca comercial Sanxenxo, 365 días.
Sanxenxo conta tamén con dous grandes tótems situados á entrada da feira que serven de escaparate para mostrar a variada oferta de Sanxenxo.
Baixo o slogan "Sanxenxo 365 días diferentes" mostra a súa variada oferta turística á entrada da feira a través de oito imaxes cedidas polo Real Club Náutico de Sanxenxo e a asociación Ollares de Portonovo.
Nelas pódese ver a ruta de sendeirismo de Dorrón que evoca a paisaxe verde, unha parella de flamencos na lagoa de Rouxique (Vilalonga) como potencia do turismo ornitolóxico; ou a dous pescadores entre Punta Corveiro e Punta Faxilda mostrando as posibilidades deportivas e paisaxísticas.
Ademais, aparellos no porto de Portonovo reflicten a riqueza gastronómica e a actividade pesqueira e a regata do campionato de Europa da clase 6 metros de vela é o símbolo dos deportes náuticos.
A estas imaxes súmanse as dunha muller gozando dun spa que evoca o turismo de saúde e benestar, vistas do Paseo de Silgar iluminado como referente comercial e a capela da Lanzada, icona do patrimonio de Sanxenxo.
Durante estes días de feira están previstos varios encontros de traballo con distintas empresas do sector turístico e estudar posibles sinerxías con outros destinos turísticos.