Barcelos estrea oficialmente desde este venres o seu novo aspecto. A entrega ao Concello da obra de humanización de todos os viais perimetrais da praza pon fin a dezaseis meses de traballos neste ámbito urbano que, desde agora, é máis verde e máis peonil.
"Está obra é exemplar porque nos permite un espazo público de alta calidade e de accesibilidade universal no centro da cidade", destacou o alcalde, Miguel Anxo Fernández Lores, que xunto co presidente da Deputación, Luis López, presidiu a firma da acta de recepción.
Na reforma integral dos viais que rodean a esta emblemática praza, o Concello investiu máis de 1,9 millóns de euros, financiados a través dun convenio coa institución provincial.
Esta actuación, que foi executada pola empresa EC Casas, supuxo retirar a calzada de lastra e substituíla por asfalto desde Perfecto Feijóo ata a Rúa do Rouco, cun tratamento diferenciado fronte ao colexio de Barcelos.
Para poder ampliar as beirarrúas e reforzar todo o carácter peonil, reduciuse a circulación a un único carril, implantando o sentido único con dirección obrigatoria facía a Rúa do Rouco e Cobián Roffignac, polo que xa non se podería circular en dirección a San Antoniño.
Os aparcamentos en superficie, pola súa banda, pasaron a ser de servizos. É dicir, limitados a quince minutos. Tamén se colocou mobiliario urbano e renovouse a iluminación.
Fernández Lores destacou que esta obra incluíu "traballos que aparentemente non ven pero que fan que a cidade funcione" como a renovación de todos os servizos soterrados de saneamento ou abastecemento, que tiñan máis de corenta anos de antigüidade.
Ademais, reforzouse o carácter verde desta praza e plantáronse novas árbores en todo o seu perímetro, á espera da ansiada conexión cos xardíns de Santa Clara, que creará un "pulmón verde" duns 20.000 metros cadrados.
Tanto o alcalde como o presidente da Deputación destacaron o "traballo excelente" realizado polos técnicos responsables deste proxecto e puxeron esta actuación como exemplo de colaboración institucional e veciñal. "É un día importante", sinalou López.
Este espírito colaborativo, segundo ambos os dirixentes, manterase cos futuros accesos a Santa Clara, que queren que sexa "accesible e fácil" para os cidadáns. Cando o organismo provincial teña definido o proxecto, o Concello ofreceralles a súa "máxima colaboración".
A este respecto, o vicepresidente provincial, Rafa Domínguez, indicou que en quince días confían en ter o proxecto básico de intervención no antigo convento e que, segundo as súas previsións, debería estar licitado antes de que termine este ano.
Engade Pontevedra Viva como fonte preferida de Google de balde
Mantente informado coas últimas noticias de actualidade.