Portonovo recuperará a fachada marítima do miradoiro da Peixeira e a súa conexión co campo de San Roque
Por Redacción
Recuperar a fachada marítima do emblemático miradoiro portonovés da Peixeira e humanizar a conexión co campo de San Roque son dous dos obxectivos do proxecto que o Concello de Sanxenxo acaba de presentar ao Programa PON 2023. A actuación, valorada en 990.537 euros, opta a obter o 80 % dos fondos do organismo provincial e o 20 %, das arcas municipais.
A intención é que a praza e a fronte marítima reconecten coa súa orixe, converténdose nun espazo revalorizado de convivencia e socialización de forma integral, un novo eixo de actividade do núcleo. O proxecto contempla unha serie de plataformas, enlazadas mediante ramplas accesibles e escaleiras, que conectarán de forma directa a Praza de San Roque e a Avenida de Pontevedra. Tanto as vivendas como a parte alta do núcleo antigo de Portonovo veranse beneficiadas por unha accesibilidade universal e inclusiva.
O protagonismo do espazo será o peón, polo que o tráfico rodado quedará relegado a un segundo plano mediante estratexias de acougado de tráfico, colocando badenes na entrada e saída da zona. O fluxo peonil se reconfigura en toda a praza, con espazos máis amplos, libres de obstáculos, fomentando unha mobilidade sostible e agradable, que recupera a esencia da mobilidade do núcleo tradicional de Portonovo.
No vial da Avenida de Pontevedra, o único con acceso rodado, limítase o paso do vehículo a un carril dunha soa dirección.
Dentro dos obxectivos do proxecto atópase a eliminación, na medida do posible, das barreiras arquitectónicas, visuais e ambientais, polo que se opta por desmantelar parte do gran muro de contención actual co fin de renaturalizar e descontaminar a fronte costeira e, en consecuencia, de mellorar paisaxisticamente e funcionalmente a conexión do núcleo co mar.
Para iso, ademais de demoler o muro e tratar de recuperar o territorio e paisaxe previo, incluiranse especies arbóreas autóctonas e reutilizaranse os materiais de demolición para o seu emprego en distintos elementos do mobiliario. En canto á iluminación actual substitúese por outra cunha proxección máis baixa, máis contida, totalmente integrada nos muros e varandas de bloque de formigón xerados.
Relacionadas:
-
Seis empresas optan a executar a humanización da contorna do miradoiro da Peixeira
Por Redacción |
-
Esta semana sae a concurso a licitación da reforma do miradoiro da Peixeira por 990.500 euros
Por Redacción |
-
Un millón de euros para transformar o campo de San Roque e o mirador da Peixeira
Por Oskar Viéitez |
-
Máis de 40 opcións culinarias diversas no inicio do Portonovo Gastronómico
Por Redacción |
-
Os doce proxectos cos que Telmo Martín quere liderar Sanxenxo cara 2027
Por Alejandro Espiño & Mónica Patxot |
-
Sanxenxo estrea o seu 'banco pola igualdade' cunha andaina desde Portonovo
Por Redacción |
-
A Festa da Raia reinvéntase nas súas vodas de prata a través das redes sociais
Por Redacción |