O presidente de "Correlingua" Anxo Terán, xunto con outras persoas vencelladas á organización, presentou en Pontevedra a 25º edición de "Correlingua".
Esta proposta de carácter lúdico-educativo pretende convidar a mocidade, a infancia e os centros de ensino a participar nun acto público de reivindicación do dereito a medrar en galego.
Nas palabras de Anxo Terán, esta iniciativa é "case a actividade máis normalizadora en todo o país", e resulta "imprescindible" continuar con ela.
O proxecto está destinado a un público infantil e xuvenil debido á importante perda de falantes que se está a producir entre a poboación máis nova.
O seu obxectivo é o mantemento e difusión do idioma coa participación activa dos propios destinatarios: a mocidade.
A proposta, alcanzou ao longo destes anos unha alta participación dos centros de ensino e do alumnado, así como o apoio de persoeiros e organizacións de todo tipo.
O proxecto leva 25 anos contando coa participación e colaboración de sindicatos, asociacións pedagóxicas e Concellos como o de Pontevedra.
Ante isto, a coordinadora comarcal do "Correlingua" da Coruña Celia Armas recalcou que "25 anos de éxito fainos pensar que a nosa lingua ten futuro".
Con todo, o secretario nacional da CIG-Ensino Suso Bermello, denunciou a non participación ou subvención da Xunta de Galicia en todo este tempo.
Arredor do Día das Letras Galegas ten lugar o acto central de "Correlingua", unha carreira non competitiva que percorre once localidades.
Este ano, a cidade de Pontevedra será o lugar onde vai celebrarse o punto final desta edición o día 29 de maio e, polo tanto, onde terá lugar a última carreira.
AMPLO PROGRAMA
Pero a proposta non é un acto puntual, senón un programa extenso no tempo que serve de pretexto para a normalización lingüística nos centros de ensino.
A carreira é o acto central, pero a iniciativa consta de actividades que se inician co curso e culminan en maio.
A maioría das actividades céntranse no alumnado dos centros de ensino secundaria, aínda que tamén se propoñen actividades específicas para as nenas e nenos de primaria e infantil.
Este 25 aniversrio, o programa inclúe propostas moi diversas.
A primeira é "Lema!", na que os diferentes centros participantes construiron o slogan da campaña deste ano o último trimestre do 2024.
Tras recibir 29 propostas, o lema elixido foi "A mocidade activa por unha lingua viva" do IES Breamo de Pontedeume.
Outras das actividades, que se leva desenvolvendo desde xaneiro, é "Regueifando!".
Esta leva executándose todos os anos desde a pandemia, e consta da realización dunha regueifa colectiva na que cada centro grava tres coplas que se mesturarán nunha peza conxunta.
Por outro lado, a iniciativa tamén conta cun obradoiro de escrita creativa chamado "Desata a lingua".
O taller impartirase por escritores en aulas de 1º e 2º da ESO co obxectivo de elaborar un manifesto colectivo que se lerá na carreira.
O manifesto desta edición foi realizado no curso 2022/2023, e este ano vai elaborarse o manifesto do "Correlingua 2026".
O último certame dirixido a centros educativos, é o "Crealingua", un concurso libre de creación artística en galego.
Nel, impúlsase o desenvolvemente de diferentes formas artísticas, como a realización de banda deseñada ou a gravación de vídeos e tik toks, entre outros.
Estas competicións teñen o obxectivo de ofrecer aos centros actividades preparatorias que permiten a reflexión sobre o idioma e sirvan de preparación para a recta final do "Correlingua".
Ademais, a proposta tamén conta cun certame chamado "Catalingua", unha convocatoria musical dirixida a bandas e solistas en lingua galega de calquera estilo musical.
Trátase dun dos concursos de música máis veteranos de Galicia, e por el levan pasado as principais bandas e solistas do panorama musical galego dos últimos anos.
As bandas gañadoras serán as que participen nas Festas do "Correlingua".