A sede da UNED de Pontevedra dedicará, o vindeiro luns 10 de novembro ás 19:00 horas, un acto especial ao pintor Antón Sobral en recoñecemento aos seus cincuenta anos de contribución á arte e a cultura galega contemporánea.
A homenaxe, que terá lugar no Salón de Actos do Centro Asociado, reunirá a figuras da arte, representantes institucionais, veciñanza e amizades para destacar o compromiso humanista e creativo do artista.
A obra de Antón Sobral estivo ligada durante cinco décadas á sensibilidade, a introspección e a conexión coa paisaxe e a sociedade galega.
A súa traxectoria combina unha constante procura de beleza e equilibrio, e unha dimensión comunitaria que deixou pegada en varias xeracións.
Para Rafael Cotelo, coordinador de Extensión Universitaria da UNED en Pontevedra, "Antón Sobral representa o mellor do espírito creativo galego: a arte como compromiso coa vida, a amizade e a comunidade", subliñando que o legado de Sobral vai máis alá da súa obra plástica.
O programa do acto inclúe intervencións institucionais, testemuños de amigos e colegas artistas, e a proxección de imaxes que percorren os fitos da súa carreira.
Ademais, o gaiteiro e flautista galego Óscar Ibáñez ofrecerá a sesión musical da velada.
Durante o evento vai presentarse o catálogo conmemorativo "Sobral. 50 anos creando", dispoñible tanto en formato físico como dixital, que recolle unha selección de obras e textos sobre o artista.
O encontro finalizará cun viño de honra, que permitirá aos asistentes compartir momentos co propio artista homenaxeado.