O escritor e xornalista Afonso Eiré presenta este venres 27 de xaneiro ás 19.30 horas no salón de actos do Museo Manuel Torres de Marín, a súa última novela 'Ausentes', editada por Hércules de Ediciones, nun acto organizado pola Asociación cultural Grupo Aberto.
Neste libro, o escritor e xornalista recolle vivencias dos que, ao longo da historia, tiveron que emigrar a distintos países de América, de Europa ou noutras comunidades do Estado, pero tamén dos que quedaron en Galicia xa que, como comenta o autor, "todos sofren de ausencia".
Ofrécese nesta novela un achegamento aos personaxes penetrándose nos pensamentos e nas súas vidas. O escritor, que foi director da Nosa Terra, sitúa a acción entre as persoas convidadas a unha voda na que os asistentes están relacionados coa emigración.