O venres 28 de febreiro, o Teatro Principal de Pontevedra acollerá un concerto especial no marco da iniciativa Xeración Sónica, un proxecto artístico-musical impulsado pola Concellería de Xuventude e xestionado por Estudo Bonobo e Artecalavera.
O acto que comezará ás 20:00 horas, presentará as novas bandas desta edición e celebrará a publicación do Xeración Sónica vol.6 e a versión de Estou na lavadora, feita por Rager, unha das bandas do proxecto.
No escenario van reunirse as bandas da Xeración Sónica 2025:
Rager, Vexx, Ferralla, Básica, Altofalantes e Brasas.
Ademais, contará coa participación de bandas de proxectos irmáns, como o Local de Música de Pontevedra, que presentará a Klavo e JüNNE, e a Banda do Rocklab.
A actuación de Rager terá un significado especial, xa que a súa versión de Estou na lavadora formou parte do documental BRAVÚ XXX, estreado hai poucos meses.
Tanto este tema como o Xeración Sónica vol.6 estarán dispoñibles nas plataformas dixitais a partir do propio día 28.
Xeración Sónica é unha iniciativa destinada a rapaces de 13 a 17 anos que busca fomentar a creación de proxectos musicais orixinais con percorrido e impacto na cidade.
O proxecto inclúe rutas de concertos, gravacións e publicacións baixo o selo de Artecalavera, consolidándose como unha plataforma clave para o descubrimento de novos talentos.
Nos últimos anos, o proxecto medrou e estendeu as súas conexións con iniciativas similares, como a Escola de Rock de Paredes de Coura (Portugal), e participou en festivais como o Virafest 2023, coa súa presenza confirmada tamén para este 2025.
Ademais, Xeración Sónica ten vínculos co sector educativo a través de “Recreos ao Vivo”, unha serie de concertos nos centros educativos da cidade celebrados con motivo do Día das Letras Galegas.