Benvida musical ao Culturgal 2025 cun concerto único polos 40 anos de traxectoria de Uxía Senlle

Xa está aqui unha das citas culturais máis esperadas do ano en Pontevedra, Culturgal, que durante este fin de semana encherá de actividade o recinto feiral e o Pazo da Cultura.

Para darlle a benvida, este xoves 27 o auditorio do Pazo encheuse de cultura, de música e de espazos compartidos da man de Uxía Senlle.

A artista abriu Culturgal 2025 cun concerto que, á súa vez, supuxo un repaso aos seus 40 anos de traxectoria artística.

Subíronse ao escenario catro décadas dunha das voces máis emblemáticas da música galega e tamén moitas máis voces amigas.

Acompañárona De Vacas, Antía Muíño, As Mosas (Chus e Ana Senlle), João Afonso e Quim Farinha nunha noite marcada pola emoción.

Non faltou tampouco unha banda de músicos cómplices na traxectoria de Uxía: Sérgio Tannus, Santi Cribeiro, Isaac Palacín e Pablo Novoa.

Xuntos realizaron un percorrido polas cancións máis emblemáticas do seu repertorio, creando un universo sensorial que avanzou do íntimo ao coral.

A súa actuación serviu tamén para dar a benvida a unha edición de Culturgal da que o seu director, Camilo Franco, destaca que ten a programación musical "máis interesante da historia da feira".