Con catro espectáculos dunha "alta calidade e variedade". Así regresa ao Teatro Principal o ciclo Ponteatro, que traerá a Pontevedra a algunhas das mellores compañías escénicas do país nunha programación que se concentrará entre o 19 de outubro e o 16 de novembro.
As compañías Lazona Films, Sarabela Teatro, Diego Anido e Amorodio Teatro son as autoras das pezas teatrais das que o púbico poderá gozar esos catro xoves, a partir das nove da noite.
O ciclo abrirá o xoves 19 con María Luisa, de Lazona Films, unha comedia sobre a soidade, sobre a vellez e sobre os difusos límites entre a realidade e a imaxinación. Narra a vida dunha muller entrada en anos que vive soa e que coñecemos a raíz dunha conversa co porteiro da casa.
Unha semana despois, o xoves 26, será a quenda de Arraianos, de Sarabela Teatro, que adapta dous relatos de Xosé Luis Ferrín nos que transitan o erotismo, o misterio, a miseria, a conciencia e a grandeza de alma e de vida. Historias de meigas, contrabando, caciquismo e agrarismo.
Para o xoves 9 de novembro está prevista a función de O deus do pop, de Diego Anido, unha autobiografía de carácter fantástico a medio camiño entre a súa vida na Galicia dos 80 e a dunha estrela do pop americana. Desde a tenrura e o humor absurdo reflexiona sobre como creamos un relato para conformar a nosa identidade coas nosas vivencias pasadas e desexos futuros.
Este Ponteatro chegará a súa fin o 16 de novembro con A Nai, de Amorodio Teatro, que explora, a través das figuras das irmás Lola, Julia e Amparo Touza, e as súas fazañas como salvadoras dunha cantidade estimada de 500 persoas durante o Holocausto, a posibilidade de sermos mellores persoas en tempos de degradación moral.
As entradas para as obras que integran esta nova edición de Ponteatro están á venda a un prezo de oito euros, reducido a catro para estudantes, desempregados e maiores de 65 anos. Haberá tamén unha modalidade de abonos para as catro sesións, que custará 25 euros.
Engade Pontevedra Viva como fonte preferida de Google de balde
Mantente informado coas últimas noticias de actualidade.