Cécile McLorin Salvant é probablemente a maior sensación que xurdiu no ámbito do jazz na última década.
Foi xa comparada coas mellores vocalistas da historia, con nomes de lenda como os de Ella Fitzgerald, Billie Holiday ou Bessie Smith. Os seus tres únicos álbums editados ata o momento (os dous últimos en solitario), WomanChild (2013) e For One to Love (2015), supuxeron un auténtico impacto no mundo do jazz. Polo primeiro destes títulos foi candidata ao Grammy como mellor vocalista de jazz en 2014, premio que obtivo este mesmo ano 2016 pola segunda das súas gravacións.
Recentemente, rendeu a súa particular homenaxe a Bessie Smith, cantando na banda sonora do biopic sobre a lendaria cantante (titulado "Bessie"), producido pola HBO e protagonizado por Queen Latifah.
Cécile McLorin Salvant é un compendio de talentos: compuxo a letra e a música de varias das cancións dos seus dous discos en solitario, súas son as ilustracións que aparecen neles, e é capaz de cantar en inglés, francés e español.
A súa xira europea deste verán, ademais de Pontevedra, inclúe actuacións nos festivais de North Sea (Rotterdam), St. Moritz, Montreux e Vitoria, entre outros.
Ademais da voz de Cécile McLorin Salvant, en Pontevedra estiveron Aaron Diehl (piano), Paul Sikivie (baixo) e Lawrence Leathers (batería).