A Praza da Leña, set de rodaxe da serie "Las hijas de la criada"

Na mañá deste 20 de febreiro comezou a rodaxe en Pontevedra da serie "Las hijas de la criada".

Protagonizada pola actriz Verónica Sánchez, coñecida por traballos como "Los Serrano" ou "Sky Rojo". Trátase da adaptación da novela homónima da xornalista Sonsoles Ónega. 

Tras gravar en diversas localizacións da parroquia de Poio, a produtora comezou a rodar na Praza da Leña de Pontevedra.

Tamén servirá como escenario a Praza de Curros Enriquez, xunto a outras zonas do centro histórico da cidade e diferentes localidades situadas en Galicia, Madrid e Canarias. 

O libro no que se basea a súa historia, gañador do Premio Planeta 2023, está ambientado na Galicia da primeira metade do século XX. 

Inscrito no xénero de drama e romance, o proxecto segue a dúas nenas, Clara e Catalina, nacidas a mesma noite no pazo de Espírito Santo. 

A vida das súas familias será alterada debido a un acto de vinganza, que provoca un intercambio de bebés. 

A historia abarca tres xeracións de mulleres, destacando a loita de Dona Inés, a matriarca da familia Valdés, quen enfronta desamores, traizóns e loitas de poder para asegurar que a súa verdadeira filla herde un imperio nunha época na que as mulleres tiñan un papel social limitado.

A novela "Las hijas de la criada" conta con once edicións e máis de medio millón de copias vendidas en España, converténdose no libro máis vendido no ano 2023 no país.

Ademais, conta con traducións en oito países, entre os que se atopan Italia, Francia, Portugal, Rumanía, Bulgaria, Hungría, Mongolia e Rusia.

O proxecto está producido por Buendía Estudos Canarias en colaboración con Atresmedia TV, froito do acordo con Planeta Book & Film Rights.