Alfonso Rodríguez Castelao, Branco Porto, Iglesias Vilarelle ou Losada Diéguez xuntáronse polo ano 1925 para fundar a Sociedade Coral Polifónica, que ofrecía o seu primeiro concerto público o 9 de abril aproveitando a celebración do Xoves Santo na igrexa conventual de San Francisco. Este mes con motivo do noventa aniversario, esta institución que continúa ofrecendo concertos volverá actuar nese mesmo espazo o domingo 12 de abril a partir das 20.30 horas.
Este concerto da Coral Polifónica dedicarase a todas aquelas que, durante estas décadas, colaboraron con esta agrupación con especial atención á figura de Xosé Filgueira Valverde, intelectual ao que se lle dedica o Día das Letras Galegas deste ano. Filgueira Valverde presidiu a Sociedade Coral Polifónica entre 1978 e 1996.
Tras máis de 700 concertos ás súas costas e con actuacións de carácter internacional en lugares como Portugal, Arxentina ou Uruguai, a Coral encóntrase dirixida na actualidade por Nanette Sánchez Ordaz e o domingo 12 de abril ofrecerá un concerto no que se alternarán obras clásicas do repertorio con novas pezas.
A entrada será libre ata completar o aforamento da Igrexa de San Francisco.