A Consellería de Cultura, Educación e Ordenación Universitaria, o Concello de Cotobade e a Deputación Provincial de Pontevedra presentaron este venres a segunda edición do Certame de Relato Breve Nélida Piñón, nun acto que contou coa participación da escritora brasileira de raíces galegas, precisamente de Cotobade.
O certame naceu co obxectivo de homenaxear a escritora que lle dá nome, Nélida Piñón Cuíñas, a quen o secretario xeral de Cultura, Anxo Lorenzo, cualificou como "unha traballadora das palabras e dos afectos" e tamén foi creado coa idea de promover a actividade literaria dos novos escritores e de lles ofrecer un escaparate para dar a coñecer as súas primeiras creacións.
Este ano o certame estende o seu formato de relato curto ata as 30 páxinas e introduce a novidade de dous accésits, o que, ademais de darlle a oportunidade a outros dous autores de ver premiado o seu traballo, permitirá tamén incorporar eses relatos á edición que se promove cada ano para difundir as obras.
Xunto co goberno galego, promoven este certame o Concello de Cotobade e a Deputación de Pontevedra, representados, respectivamente, polo alcalde, Jorge Cubela, e polo deputado de Cultura, Xosé Leal, nun acto que tivo lugar na Casa do Concello de Cotobade e que tamén contou coa asistencia do secretario xeral técnico da Consellería de Cultura e Educación, Jesús Oitavén.
PRAZO DE PRESENTACIÓN
Ao certame poden concorrer autores maiores de 18 anos de calquera nacionalidade, con obras orixinais e inéditas escritas en galego e cunha extensión mínima de 20 e máxima de 30 páxinas, que se presentarán entre o 1 de outubro de 2016 e o 1 de maio de 2017. Dotado con 4.000 euros e mais con dous accésits de 1.000 euros cada un, o premio tamén inclúe a publicación das obras seleccionadas.
As bases poden consultarse na páxina web de Cultura.
Na primeira edición, o autor galardoado foi Xesús Castro Yáñez, pola obra ‘O vello e o Minotauro’. O relato, que é unha reescrita do mito clásico que vencella a Teseo, foi seleccionado entre un total de 180 traballos e viu a luz en 2015 nunha publicación.