O plan de apoio da Deputación de Pontevedra ao sector cultural renóvase e pasa a denominarse 'Culturea'. Luis López, presidente provincial, presentaba este venres a proposta para apoiar tanto ás entidades sen ánimo de lucro como ás agrupacións culturais que desenvolven actividades relacionadas coa cultura popular e coas tradicións nos distintos municipios de Pontevedra.
O orzamento previsto ascende a un millón de euros, un 25% máis do consignado para o 2023, segundo indicou López.
"Culturea é o herdeiro dos plans de apoio que se veñen poñendo en marcha na Deputación desde os anos 80, incluído o Pontegal e adeamis é o programa cultural máis ambicioso desde o punto de visita orzamentario", explicou o presidente provincial.
Indicou que estas axudas destinaranse a cubrir as demandas das asociacións veciñais, celebracións gastronómicas, reunións de barrios e comisións de festas.
Tamén se reforzará a difusión das actividades a través da páxina web da Axenda Cultural da Deputación e contarán con perfís propios nas redes sociais. Ademais, a Deputación ten previsto ofrecer facilidades para a impresión e o deseño de carteis.