Un dos eventos culturais de referencia en Pontevedra, o Culturgal, xa ten datas fixadas para celebrar a súa edición de 2025. Será os días 28, 29 e 30 de novembro.
Así o confirmaron os organizadores desta Feira das Culturas Galegas, que volverá a converter o Recinto Ferial pontevedrés no lugar de encontro dos axentes culturais co seu público.
De cara a esta nova edición, que será a décimo oitava deste evento, a organización xa está traballando a toda velocidade.
Así, a partir do próximo martes 8 de xullo, os interesados en participar no Culturgal xa poderán solicitar un dos postos que se habilitarán.
Ata o 31 de agosto haberá un primeiro prazo de solicitude de postos, ao mesmo prezo que o ano pasado. Posteriormente haberá un segundo prazo, do 1 ao 15 de setembro, cun incremento dos prezos do 25%.
Os postos outorgaranse por orde de chegada das solicitudes e a reserva debe facerse a través da web cultur.gal.
Pola súa banda, aclara a organización, os postos de artesanía e arte contemporánea terán condicións especiais de contratación como o ano pasado.
Na edición de 2024, na que houbo máis de duascentas actividades e un cento de expositores e na que participaron uns 500 artistas, case 13.000 persoas pasaron pola feira Culturgal.