Día para cantar a Rosalía na procura de mil primaveras máis

A Deputación de Pontevedra conmemorou este 23 de febreiro o Día de Rosalía de Castro coa presentación dunha nova edición do certame educativo "Canta Rosalía".

O presidente provincial, Luis López, recibiu no salón de plenos a medio cento de alumnos e alumnas do CEIP A Carballeira (Lourizán) para dar a coñecer as bases desta iniciativa que busca difundir a obra da poeta entre a mocidade.

O concurso está dirixido a todos os centros de Educación Primaria, Secundaria e Educación Especial da provincia.

A proposta consiste na gravación de pezas audiovisuais nas que o alumnado debe recitar poemas da autora incluíndo elementos de dramatización, como escenificación, vestiario ou acompañamento musical.

O prazo de inscrición para os centros interesados permanecerá aberto ata o vindeiro 20 de marzo.

A institución provincial destinou un orzamento total de 4.500 euros para este certame, que se distribuirán en premios de material didáctico.

A convocatoria establece catro categorías en función da idade e as características dos participantes:

• Campaniñas: para o primeiro ciclo de Primaria (1º, 2º e 3º).

• Airiños: para o segundo ciclo de Primaria (4º, 5º e 6º).

• Fontiñas: destinada aos catro cursos de Educación Secundaria.

• Paxariños: dirixida especificamente ao alumnado de Educación Especial.

Durante o encontro no Pazo provincial, o alumnado participou nun recital poético no que tamén interviron o deputado de Cultura, Jorge Cubela, e o director do centro educativo, Miguel Roibás.

A xornada conmemorativa concluíu coa proxección de traballos de edicións anteriores e a representación da peza teatral Brincadeiras da lingua, a cargo da compañía Migallas Teatro.

O evento serviu para explicar as funcións da Deputación na protección e difusión da cultura galega, citando outras iniciativas vinculadas a figuras fundamentais como Castelao ou Otero Pedrayo.