Este xoves, ás 21.00 horas, bota a andar no Teatro Principal unha nova tempada de Ponteatro que achegará 6 espectáculos que combinan diversas artes escénicas e xéneros teatrais.
É o caso de Ron Lalá e a súa proposta '4X4' cargada de humor, teatro e música que, a día e medio da representación, xa completou o patio de butacas e boa parte do anfiteatro.
A compañía, fundada en Madrid é cunha traxectoria de máis de 20 anos, acumula numerosos premios e recoñecementos.
A obra que representarán en Pontevedra é unha viaxe ás catro primeiras obras de Ron Lalá. Un percorrido polas escenas esenciais dos espectáculos que a consolidaron como unha das compañías máis premiadas e aclamadas pola crítica e público: "Mi misterio del interior", "Mundo y final", "Time al tiempo" e "Siglo de Oro, siglo de ahora".
Segundo explica a propia compañía, '4x4' é "unha ruta teatral e musical, co desafío de revivir as catro propostas e dar conta da evolución creativa e escénica dos ronlaleiros".
Unha creación colectiva dirixida por Yayo Cáceres e cun elenco integrado por: Juan Cañas, Miguel Magdalena, Diego Morales, Luis Retana e Daniel Rovalher.