O Palacete das Mendoza acollerá a partir do venres 3 de outubro a exposición "Mundos Deconstruídos", de Fernando Carballa, unha mostra que estará dispoñible ata o 19 de outubro na sede de Turismo Rías Baixas.
O artista pontevedrés presenta unha proposta na que o debuxo abandona a súa función preparatoria para elevarse á categoría de obra de arte independente. Sen artificios, os seus traballos rexistran o trazo directo, o pulso do creador e convértense na substancia do que acontece.
Fernando Carballa Villanueva, natural de Pontevedra, iniciou os estudos de Belas Artes en Tenerife e licenciouse na Facultade de Belas Artes de Madrid. Posteriormente realizou cursos de gravado na Facultade de Belas Artes de Pontevedra.
O seu currículo expositivo inclúe mostras como "Atlantic Waste" (2013), "Oír Arte" (2012), "Estampa" (2011), "Visibles" (2011), "Esqueletos de Agua" (2011), "Poemas Visuales" (2009), "O Mar" (2009), "Texturas" (2009), "A Viaxe" (2008) e "Tres Visións sobre o Mar" (2008), entre outras.
Ao longo da súa carreira, Carballa traballou diversas técnicas como a pintura, o collage, a fotografía, o gravado, a cerámica ou o fotopolímero.
Na súa obra destaca especialmente a serie "Atlantic Waste", unha colección que o artista mantén viva como obra aberta, incorporando continuamente novos traballos mediante un proceso de autorreflexión.
A exposición poderá visitarse de luns a venres de 8:00 a 20:00 horas, os sábados de 10:00 a 14:00 e de 16:00 a 19:00 horas, e os domingos e festivos de 10:00 a 14:00 horas.