A banda de música de Vilagarcía xa ten todo listo para o que será unha das súas principais citas do ano co seu público, o Concerto de Fin de Ano, que chega á súa décimo quinta edición.
Será o vindeiro luns 30 de decembro, a partir das 20:00 horas, no auditorio municipal.
Como vén sendo habitual, a primeira parte será a máis sinfónica, neste caso con dous pasodobres: un, "Hispania", do autor español Agustín Ramos, e outro, "Saga cándida", do belga Bert Appermont.
A segunda sección, como non pode ser menos nun concerto de fin de ano, se dedicará á extensa produción de valses, polkas e marchas da familia Strauss.
Neste caso será con pezas menos coñecidas do seu repertorio, pero rematando coa inevitable e recoñecida Marcha Radetzky, de Johan Strauss.
A banda, dirixida por Jesús Nogueira, e a concellería de Cultura, que lidera Sonia Outón, convidan ao público a participar neste concerto, no que os setenta membros da agrupación darán o mellor de si para despedir o ano 2024 no máis alto.
As entradas xa se puxeron á venda. Os prezos son de 5 euros para as zonas A e B e de 4 para a C. Non hai gastos de xestión, posto que a venda é directa.