Explorar os límites e as posibilidades expresivas dos materiais forma parte da acción artística e esa esencia é recollida na exposición 'Formas de atrapar unha sombra', que permanece aberta desde este mércores 22 ata o 23 de febreiro na Sala Universitaria Manuel Moldes, situada na Facultade de Belas Artes.
Marcos Covelo é o comisario desta mostra, que recolle obras de Maite Leyún; Emilia Guimeráns; o exalumno Salvador Cidrás e o profesor Nono Bandeira.
Nas pezas utilízase a cerámica como punto de partida ofrecendo un uso intuitivo e experimental no proceso artístico.
Ademais, tómase como punto de partida o mito de Kora, recollido polo escritor romano Plinio o vello, que expón o nacemento da pintura no momento en que Kora quixo inmortalizar a imaxe do seu amante.