O Museo de Pontevedra preparou unha serie de obradoiros infantís para as vacacións de Semana Santa, coa intención de achegar aos máis novos propostas artísticas inspiradas nas coleccións do Museo e en destacadas figuras da cultura galega.
Poderán asistir nenos e nenas de entre 7 e 12 anos ás actividades que se celebrarán o sábado 28 de marzo e tamén o martes 1 e o mércores 2 de abril.
O prazo para inscribirse comeza esta mesma semana, o mércores 18 de marzo, ás 10:00 horas. Poderase reservar a través da web do Museo para participar nos obradoiros de ilustración botánica.
Estas sesións independentes terán lugar o martes 31 de marzo e o mércores 2 de abril, entre as 11:30 e as 13:30 horas, no Edificio Castelao.
A ilustradora Chus Rojo guiará aos asistentes na observación artística de plantas e elementos florais, ensinándolles a debuxalos para crear o seu propio caderno botánico.
Con esta actividade búscase instruír sobre distintas especies de flora da contorna, identificando as súas cores e partes características. Para conseguilo, utilizaranse tanto as obras e pezas do Museo como flores naturais, fomentando a interpretación creativa.
Por outra banda, polo Día das Artes Galegas, realizarase outro obradoiro creativo centrado no fotógrafo José Suárez.
O venres 20 de marzo abrirase o prazo de inscrición para todas aquelas persoas que queiran participar; as reservas realizaranse a través de WhatsApp no número 617340323.
A actividade terá lugar o sábado 28 de marzo, de 11:30 a 13:00 horas, tamén no Edificio Castelao. Este obradoiro, impartido por Taller Aberto, propón un achegamento á vida, á obra e á forma artística de José Suárez.
Para descubrir a forma peculiar de narrar historias a través da fotografía de José Suárez, ao longo da sesión percorrerán algúns lugares que fotografou e coñeceranse personaxes que retratou.
Ademais, estudaranse algunhas das súas imaxes para aprender nocións básicas de composición ou o uso de planos contrapicados, entre outras técnicas que axudan a explicar o estilo de vida das persoas retratadas.