O Auditorio da Sede de Afundación en Pontevedra prepárase para pechar abril cunha programación cultural variada que, tras a paréntese da Semana Santa, ofrecerá unha cita semanal coas artes escénicas e a música.
Humor, teatro, maxia e un concerto barroco conforman unha axenda pensada para públicos diversos e con nomes destacados sobre o escenario.
A programación arrincará o 11 de abril con Corta el cable rojo, un espectáculo de improvisación e comedia que chega á cidade tras preto de quince anos de éxito continuado en Madrid.
Con varios cómicos en escena, a proposta combina humor en directo, música e recursos visuais para crear unha experiencia dinámica na que cada función é distinta, marcada pola creatividade e a interacción.
O teatro voltará o día 17 con Mejor no decirlo, protagonizada por Imanol Arias e María Barranco. A obra expón, en clave de comedia, a convivencia dun matrimonio que aprendeu a soster a súa relación a base de silencios oportunos. A historia dá un xiro cando ambos deciden romper esa regra non escrita e dicirse todo o que calaron durante anos.
Apenas un día despois, o 18 de abril, a maxia chegará en sesión de tarde con Ilusiónate, de Borja Montón. Concibido como un espectáculo familiar, propón unha reflexión sobre a perda da ilusión co paso do tempo, convidando a pequenos e maiores a redescubrir a capacidade de asombro.
A proposta chega a Pontevedra tras unha xira que pasou por distintos puntos de España e países de Latinoamérica.
O broche final do mes será o 28 de abril cun concerto da agrupación Il Fervore, en colaboración coa Sociedade Filharmónica de Pontevedra.
Especializado na interpretación historicista, o conxunto abordará un repertorio centrado na obra do compositor italiano Alessandro Scarlatti.
Sobre o escenario, sete intérpretes —entre eles a soprano Jone Martínez e o director Jesús Merino— darán vida a pezas dos séculos XVII e XVIII con instrumentos de época.
A actividade cultural non se deterá aí. Xa en maio, o auditorio acollerá novas propostas teatrais como Querida Agatha Christie, con Carmen Morales e Juan Messeguer á fronte do elenco, dentro da programación de abonos.
