Irritación, melancolía e seguridade abren Titirivedra

O festival Titirivedra iniciaba este luns 13 unha programación que se estenderá ata o sábado 18 de xullo.

O pano desta edición levantábase durante a tarde coa compañía galega Titiritrés, que presentou, nos xardíns de Marescot, a obra Emotivas.

A través de personaxes que encarnan a melancolía, a irritación e a seguridade, a peza abordou como na película 'Inside Out', de Pixar, a xestión e o recoñecemento das emocións na infancia, representándoas como pequenos seres de cores.

A primeira xornada concluíu pola noite na praza do Teucro da man do artista arxentino Manu Mansilla, quen puxo en escena a obra para adultos Cóctel.

A actividade continúa este martes con dous espectáculos que combinan humor, a participación do público e a memoria histórica:

19:00 h | Xardíns de Marescot (Público infantil e familiar):

Manu Mansilla regresa con Títeres a cielo abierto. A obra presenta a Benigno Escalante, un monstro que resulta ser dócil, e a Peligro, un personaxe que busca cómplices entre o público infantil para un plan de conquista que se contrapón á conservación do planeta.

A función aborda tamén a relación e o conflito de autoridade entre o propio titiritero e o seu boneco Luís.

22:00 h | Praza do Teucro (Público adulto):

A compañía galega Fantoches Baj presenta Castelao, un corazón á intemperie. Esta peza de narración oral, máscaras, música tradicional e monicreques recrea a homenaxe privada que Daniel Varela Buxán, director da estrea de Os vellos non deben de namorarse en Bos Aires en 1941, realizou tras o falecemento de Castelao en 1950.

A obra percorre a biografía do autor e ilustra mediante marionetas fragmentos das súas obras Cousas, Retrincos, Os vellos non deben de namorarse e Un ollo de vidro.

A entrada para todos os espectáculos que se ofrecerán en Titirivedra ata o sábado 18 son de entrada libre.