John Pollön e a súa "Galiña e cocaína" axitan Monte Porreiro

O barrio pontevedrés de Monte Porreiro vibrou na noite deste martes coa música urbana de Hugo Guezeta e John Pollõn, que congregaron a centos de persoas no Miradoiro dentro do ciclo musical 'Urbana Monte Porreiro'.

Hugo Guezeta, natural de Ponteareas, é un dos rapeiros máis talentosos de Galicia. No espectáculo ofreceu algúns dos temas do seu primeiro traballo en solitario: "O Noso Tempo".

Nado e criado na comarca do Bierzo, John Pollõn era o axitador da noite. Saltou á fama en 2021 cando a súa canción "Gallina y cocaína" fíxose viral en TikTok, acumulando máis de 2 millóns de escoitas. Este tema, que segundo o propio artista naceu durante "os aniversarios dun amigo nun cortello", marcou un punto de inflexión na súa carreira e guindouno á escena nacional.

Desde aquel éxito, outros dous temas seus como "Contacto" ou "No es lo Mío" superaron os 4,3 e 9 millóns de reproducións respectivamente na plataforma Spotify.

O artista leonés, que nos últimos anos experimentou un ascenso meteórico na escena musical española, ofreceu un espectáculo que logra mover a centos de seguidores.

Destaca polo seu estilo urbano combinado con música electrónica e a súa versatilidade para adaptarse a bases de trap ou reggaetón, sempre engadindo un toque característico que o diferencia doutros artistas do panorama actual. 

Durante o concerto gratuíto, o público puido gozar tamén dunha exhibición de grafiti a cargo de O'Ras, que complementou a proposta musical con arte urbana en directo, reforzando o carácter alternativo e vangardista deste ciclo 'Urbana Monte Porreiro'.

A festa continuará este mércores 6 de agosto coa actuación de Rebeliom do Inframundo e Califato 3/4, programado ás 21:00 horas no mesmo escenario.