A que promete ser a edición máis ambiciosa na historia de Culturgal, xa abriu as súas portas. A Feira das Culturas Galegas volve demostrar a forza creativa de Galicia e faino, demais, aproveitando o que, segundo os seus responsables, é un momento "inmellorable".
Culturgal, que co paso dos anos foi "medrando e transformándose", reivindicou o seu presidente, Víctor López, é desde hai tempo "o evento transversal máis grande do país".
"Esta é a maior festa da cultura galega", reivindicou López, que celebrou que esta feira poida "derrubar os muros" entre as distintas disciplinas culturais e converterse nunha "casa común" onde todas estas expresións "conviven e se potencian mutuamente".
Neste 2025, a feira chega á súa maioría de idade, dezaoito edicións do que é un "soño colectivo" onde o público e os creadores culturais "vibran ao unísono", presumindo dun presente e dun futuro "que debemos coidar entre todos".
Na súa inauguración de Culturgal participou, entre outras autoridades, o conselleiro de Cultura, Lingua e Xuventude, José López Campos, que destacou que "é un orgullo" que un proxecto cultural deste nivel se celebre na cidade de Pontevedra.
Subliñou que, nun momento no que a sociedade está "tan acelerada e crispada", a cultura debe ser un "punto de nexo e unión" e converterse nun "faro que nos ilumine" nos momentos, como os de agora, de "maior tormenta social".
Galicia, segundo López Campos, está nun momento dunha "enorme eclosión cultural", grazas a unha "chuvia fina" que está a regar todo o ámbito da cultura e que permite que "agromen moitas iniciativas non territorio" que son, engadiu, "ambiciosas e extraordinarias".
Para o titular de Cultura no goberno galego, é importante "impulsar e proxectar" a cultura galega "cara a todos os lugares", xa que esta identidade é unha "riqueza colectiva", polo que apelou a que todas as administracións colaboren para "ir no camiño correcto".
O alcalde de Pontevedra, Miguel Anxo Fernández Lores, expresou pola súa banda a súa satisfacción porque a cidade se converta, un ano máis, "na casa do Culturgal", mostrando "en toda a súa extensión" a potencia do sector cultural galego.
"Que Culturgal estea en Pontevedra non é unha casualidade", asegurou Fernández Lores, que subliñou a aposta "decidida" que realiza o seu goberno por investir en cultura "co talento do país como base" e que contribúe a situar á cultura galega "no máis alto".
Durante os próximos tres días, máis de 750 profesionais do sector cultural reúnense no Pazo da Cultura, onde o público poderá gozar dunha extensa programación con preto de 225 propostas diferentes e máis dun centenar de expositores.
Serán tres días de literatura, música, teatro, cine, danza, arte contemporánea ou baile, converténdose así no mellor "escaparate" que avanzará todo o que protagonizará a tempada cultural en Galicia durante o próximo ano 2026.
Engade Pontevedra Viva como fonte preferida de Google de balde
Mantente informado coas últimas noticias de actualidade.