A Deputación organiza este sábado 15 de novembro ás 19:00 horas no Edificio Castelao do Museo de Pontevedra o concerto "Xoán Montes ao piano".
Será o último dunha serie de concertos por diferentes localidades galegas nas que os pianistas Javier Ares Espiño, Jorge Briones Martínez e Pablo Diago Busto interpretarán as obras para este instrumento dun dos grandes compositores do Rexurdimento galego.
A produción para piano de Xoán Montes é a parte máis descoñecida do seu catálogo e representa unha parte esencial do patrimonio cultural galego no eido musical.
Os intérpretes encargados da interpretación neste proxecto contan con sólidas traxectorias artísticas e consolidadas como referentes na recuperación e posta en valor da música galega dos séculos XIX, XX e XXI.
Xoán Montes é o autor da canción 'Negra sombra' e foi recoñecido pola súa música sacra e as súas composicións para coro e orquestra.
Con estes concertos quere recuperarse a súa faceta máis lúdica e revivir o seu paso polos cafés-concerto da cidade de Lugo.
O concerto desenvolverase en dúas partes e nel soarán habaneras, mazurcas, valses ou polcas, así como composicións para interpretar a catro e a seis mans.