Este venres 8 de outubro ás 20:00 horas terá lugar a inauguración de 'Dispositivos', a nova mostra do artista plástico Tebo, en Espazo Nemonon, a sala de arte situada no edificio de Villa Pilar, na rúa Marqués de Riestra 11 de Pontevedra.
A sala verase alterada por unha serie de artefactos a medio camiño entre a pintura e a escultura que forman un conxunto realizado especificamente para a ocasión, informan desde a organización da mostra.
A fachada do icónico edificio tamén contará cunha chamada de atención en forma de intervención artística nos balcóns do primeiro andar.
Con esta mostra Tebo busca asentar, resumir, expoñer e levar á seguinte fase un proceso de procura que comezou hai cinco anos, cando iniciou o seu proxecto 'Códigos'. Levado a cabo en distintos países, ten por obxectivo sintetizar en distintas series de composicións aqueles aspectos de cada cultura que máis chaman a súa atención.
A escritura, os medios de transporte ou a arquitectura son só algúns dos elementos nos que se basea para reinterpretar os lugares que visita.
Tras comezar a súa andaina na residencia artística Alfara, en Salamanca, parte rumbo á India para pasar despois por Bolivia, antes de chegar a Buenos Aires, onde fixa a súa residencia case sen propoñerllo durante un ano e medio.
De novo en Galicia e establecido en Pontevedra, desprázase a Italia para realizar a última etapa do proxecto ata o momento, 'Códigos_Roma', desenvolvida e exposta no MACRO (Museo de Arte Contemporánea de Roma).
Agora, nútrese de todas estas experiencias para desenvolver o seu propio código, un non baseado nun lugar particular senón imaxinario, que é o resultado de sumar todos os anteriores e engadir un chisco de ficción propia. Se ata o momento as técnicas empregadas para plasmar estas impresións eran a colaxe, a pintura ou a serigrafía, agora materiais como a madeira, o cemento ou a corda toman a remuda para dar forma a uns dispositivos que parecesen mostrarnos o camiño, cara a onde?.
Desta maneira tan enigmática preséntase a mostra, cunha invitación a que as persoas que visiten a exposición atopen a resposta "sen medo a trabucarse, xa que na arte todo é subxectivo".