Galifunk Brass creouse a finais de 2015 por músicos integrantes da Banda de Música de Pontevedra coa idea de ofrecer versións de temas bailables desde a época dos 70 ata a actualidade.
Este martes participaban por primeira vez na programación da Festas da Peregrina e ofrecían un concerto divertido e cheo de ritmos bailables. A música destes mozos está inspirada polas brass bands americanas e percorre estilos como o funky, o música disco ou o Rhythm and blues.
A banda pontevedresa formada por dez novos músicos está formada por trompetas, trombóns, saxos, tuba, batería e percusións. E o seu son permitiu que o público asistente á praza da Ferrería gozase bailando.
Este mércores 16 continúan os concertos da Semana Grande das Festas. Ás 21.00 horas comezará a actuación de Pelepau na praza da Ferrería. E ás 22.30 horas, a Praza de España acolle o concerto de Morat, o grupo de moda entre a adolescencia.