Os catro mil títulos de literatura infantil e xuvenil que hai nos fondos do Pazo da Cultura de Pontevedra, como consecuencia da actividade do Salón do Libro Infantil e Xuvenil, poranse de xeito permanente a disposición da cidadanía.
A partir do mes de outubro abrirá as súas portas un espazo lector no que se poderá gozar da lectura de todas estas obras ao longo de todo o ano.
A concelleira de Cultura, Carmen Fouces, manifestou a súa "ilusión" co proxecto xa que permitirá vincular o Pazo da Cultura á literatura e á lectura dos libros infantís e xuvenís de xeito permanente, ampliando as actividades do Salón.
Será ademais nun espazo cómodo e acondicionado para gozar da lectura ou facer actividades vinculadas ao Salón do Libro como contacontos, obradoiros ou encontros con autores.