Laura Cruxeiras, María Pedromingo, Sandra Varela, Beatriz Sieiro, Alba Troiteiro, Alicía García, Eva Gil e Roberto Carbajo son os artistas que durante a tarde deste sábado 29 de abril ocuparon diversos espazos na contorna da praza da Ferrería dentro da proposta 'Artistas na rúa' levando a cabo as súas creacións coa colaboración das persoas, moitos deles nenos, que pasaban polo centro da cidade.
Esta iniciativa, que leva xa tres edicións, ten como obxectivo achegar a creación de pintores, escultores e demais artistas aos cidadáns para converter as artes plásticas nun elemento máis accesible aos espectadores, que durante a tarde enchían a praza da Ferrería participando nas distintas iniciativas.
A proposta está coordinada por María Rey e por Bea Mazaira e apoiada desde a concellería de Cultura do Concello de Pontevedra.